منتديات المميزة

تاريخ الميلاد : 10/05/1991

السلام عليكم ور حمة الله و بركاته

اهلا و سهلا بكم اخواني رواد منتدى نصائح و تجارب و حلول منزلية

ــــــــــــــــــــ

حبيت اجيبلكم بعض الحلول المنزليه المجربة ..أتمنى ان تستفيدو منها :

*المايونيز ايلا طاحت لينا و مابغاتش تطلع نزيدو عليها مكعب ديال... الثلج و ملعقة صغيرة ماء بارد و نبقاو نحركو بشوية حتى تشد راسها و تجمع

*باش يخمر لينا الكرص بسرعة منين نعجنوه نديرو العجينة في كوكوت و نسدو عليها و نحطو الكوكوت فوق اناء فيه الماء سخون غدي دغيا تخمر
*الكيكة باش تطلح مزيان وتنفخ نديرو ليها شوي د الخل ف العجينة
*ابيض البيض باش يطلع مزيان نضربوه مع قبيصة د الملح
*الحريرة باش مديرتش ديك الطبقة ديال الختورة نديرو ليها شوي د الزبدة
الشابلير نشدو الخبز ونحكوه وندوزوه فالمقلة بلا زيت بلا واحو حتى يقصاح وندوزوه ف العغربال ونستعملوه بلا منيبسو الخبز وياخذ لينا وقت
*تكلم ايضا على العشوب الاربعة الي هما الازير +الزعيترة + الزعتر + ورقة موسى كاليك هدا هو سر البنة لاطباق المطاعم لكن مبقيتش عاقلة حيت مكتبش غير عقلت على النصائح الله يجازيكم بخير الي سمعات كل نصائح السيد يونس او البعض منهم تكتبهم راهم قيمين جدا جدا

1) العجائن كتسلق مع الملح والزيت ونديروها فى ونصبو عليها الماء بارد مباشرة باش كتبقى مفرزة

2) ملى نعجنو الخبز كيف العادة تنديرو شوية السكر ملى نكملو العجين تنقصو منها شوية وتنديروه فى التلاجة وفى الغد تنخلطوه مع العجين ونعجنو وتنقصو مرة اخرى باش كيجى الخبز هشيش
اما الى ماكناش تنعجنو يوميا هداك اللى تنقصوه تنديروه فى المجمد

3) باش الكيكة تتجى طالعة تنطربو البيض مع قبصة الملح اما الطحين تنغربلوه اكتر من مرة والمول تندهنوه عادى بالزبدة والطحين وفى الوسط نرشوه بشوية السنيدة

4) باش ماتعطيناش ريحة الزفورية ديال البيض فى القراشل او الحلوى.....تندهنو بالخل عاد بالبيض
5) طريقة تحمار جنجلان ملي نغسلو جنجلان ونشفوه كناخدو قياس زلافة وتنديروه غى الكوكوط على نار مهيلة مع رشه بقليل من الماء وحنى تنحركو

6) تخزين الحبوب او القطانى او العجائن فى كل قرعة تنديرو اما ازير او السالمية او النعناع او ورقة سيدنا موسى

7) ملى نبغيو نسلقو البيض الى كان الما بارد نسلقوه 10 د او الماء سخون 5 د
باش كيجيو مقاد فى الطياب

Cool

التوم باش تسهال تنقية ديالها حتى هادوك اللى تيكون صغار بزاف تنديرها فى الماء بارد

9) السودانية تنغسلوها وتنديروها تنشف على البخار فوق طنجرة او...وتدق فى المهراز

10) قشور الحامض والبرتقال

1) نقيوهم صغار وتنديروهم اتناء قلى السمك او تنغليوهم فى المائ باش كيمتص رائحة القلى

2) تنديرو قشرة الحامض مع مسحوق الاوانى

3) ملى تغسلى تقاشر خصوصا الى كانو بيضين تنديرو معاهم قشرة الحامض

4) تنديروهم فى التلاجة باش يمتص الرائحة

5) ملى نسلقو البيض نديرو قطرة الخل او قشرة الحامض

6) باش نظفو الخلاط منديرو كاس الماء سخون ماشى بزاف والملح وقشور الحامض نطحنو كلشى مزيان ونغسلوه عادى

* زيت القلي الى بقا لينا فيه الدقيق محروق نعمل فيه طرف السكر يبات فيه بهاد الطريقة غادي يتنقى
* في الطاجين الحامض باش ما يجيش مر نعمل فوقه الملح
* البسطيلة باش تكون ناجحة 3 الأوراق باش نفرق الحشوة نطيبوهم في الفران

نصيحة لمسح النحاس
مطيشات محكوكين 2+ 3 ملاعق كبار خميرة الخبز + 3 ملاعق كبار صابون بلدي + عصير حامضة
نخلط الكل وندوزوه على النحاس لي عندنا نتركه قليلا ثم نمسحوه بزيف ناشف

الى شرينا القصعة دالعجين قبل الاستعمال نعمروها بالماء لمدة 24 ساعة ثم نزولوه منها نعملو فيها زيت رومية مع البصلة دوائرنحكوها بيهم ونخليوها يوم كامل نغسلوها ونمسحوها ثم نستعملوها

باش تجيك السفة بنينة نرشوها فالتفويرة الاخيرة بنصف لتر حليب و2 م ماء الزهر لكل كيلو من الشعرية

1- الكرشة نقطعوها مربعات نعملوها في الكوكوت بلا ماء نسد عليها ربع ساعة نحل عليها
نشللها بماء دافي و إما نستعملها إما نحتفظ بيها في المجمد

2- الكاس إلى كان أصفر من كثرة الإستعمال ندهنه بالخميرة معجونة نخليه 10 دقائق
و نغسلوه هادي نصيحة لمالين الطاكسيات

3- عجينة المسمن
ناخد كمية الفورص و نص الكمية الزرع الملح و نجمع بالماء دافئ نخليها قاصحة
نرخفها بالدليك
إلى بغينا نصاوب مسمن داير ناخد الزبدة العبار نطلقها بشوية الزيت نعملها كويرات
نطلقها بالزيت و الزبدةو نخليها ترخف و نطرق و نطيب
إلى بغينا شكل حلزون نزيد الخميرة في العجين نفرق بالزبدة + أصفر البيض و من
فوقها كدلك و نطرقها و ندخلها للفران

4- البطا نطيبها بلا ماؤ نعمل في كوكوت البطاطا منقية و مقطعة مربعات + ملح
2 م ك الزيت أو الزبدة نسد عليها و نحسب 10 د من بعد الصفارة كتجي لذيذة.

5- الخميرة باش ما تجي ريحتها في الخبز نطلقها بشوية الحليب

6- الكيكة باش تجي طالعة نسخن الفران و نخدم الأبيض بحال
الثلج نخليه هو الأخير بعد الدقيق و الخمير

الى كانت عندنا اباجور عندها الغشا ديال الثوب نصبغو المصباح ديالها اللي كيضوي
(l'ampoule) باي لون مغلوق مثل الاحمر او الاخضر منين كتشعل كتعطي لون زوين

باش ما يدمعوش العينين اثناء تقطيع البصل نديرو البصلة في الماء دافي و نخليوها شوية عاد نقشروها و نغسلوها بالماء البارد ثم نستعملوها

باش نزولو الغبرة من التلفزة و خصوصا ليباف نستعملو السيشوار

الى شكينا ان الحليب اللي عندنا خاسر مانفيضوهش كامل نديرو غير شوية في ملعقة و نجربوه فوق البوطة

في بعض الاحيان كيتخلط لينا الدواء و ماكانبقاوش عارفين ديال من و لاش كيصلاح باش نتفاداو هاد المشكل ناخدو ورقة و نكتبو عليها اسم صاحب الدواء و التاريخ و لاش كيصلاح الدوا و نديروها معاه و يمكن نلصقوها عليه

الى سالات الحجرة ديال الراديو نضربوها شوية بشي حاجة و نستعملوها غدي تعاود تخدم

باش يكون عندنا الشكلاط ديما موجود لتزيين الكيك و الطورطات ناخدو لوح ديال الشكلاط و نديروه في المجمد حتى يقصاح مزيان ثم نحكوه في الحكاكة و نديروه في بلاستيكات و نحتفظ به في المجمد فينما بغيناه نلقاوه موجود

للاحتفاظ بالفواكه الجافة مثل الزبيب و البرقوق يابس و المشماش يابس نديروهم في قرعة كتسد مزيان (القراعي الخاصين بالترقاد اللي فيهم الكاواتشو فالسدادة ديالهم) و نكبو عليهم عصير برتقال او اي عصير او مشروب عندنا و نديرو القرعة فالثلاجة و وقتما بغينا نزينو شي طورطة او حلوى نلقاوهم واجدين

البطاطا فريت باش تجي زوينة و لذيذة منين نقطعوها نرقدوها في الماء و الخل عاد نقليوها

بالنسبة اللي فيه الفواقة يدير طوبة سكر في الفم ديالو و غدي تزول

باش نبوكليو الشعر للبنيتات الصغار بعدما نغسلو الشعر نضفروه كله و هو فازك ثم نشفوه مزيان بالسيشوار و من بعد نحلو الضفيرات و غدي يولي الشعر بوكلي بلا كوافورة

باش نزولو المداد على اليدين نحكوهم بمطيشة مزيان

الزربية الى اللون ديالها تبدل تنرشوها بماء معدنى ونخليوها 10 د ونشطبوها على شكل دائرى ومن بعد تشطب عادى ونديروها فى الشمس

الزربية الى طبعات بالمربى او القهوة نفزكو منديل بالماء ولالكول ونمسحو مكلن الطبعة ونحكوه مزيان

الملابس الى كان فيهم الصدا تندهنوهم بعصير الحامض ونخليوه فيها ومن بعد تغسل بصابون الحجرة

الى كان عندك الدبان فى المنزل تديري كاسرونة فيها الماء مع الخزامة وتبقى تغلى راه ماتيبقاش

باش نحيدو رائحة الشواء من المنزل ملى نساليو الشواء نديرو طرف من قشرة الحامض او البرتقال فى المجمر

طبايع ليدام فى الملابس ترشو بطالك ونفركوهم باليد بلا ماء من بعد نغسلوهم بصابون الحجرة

الشكلاط باللوز مكلي
نغسلو اللوز و نديروه في مقلة ثقيلة و نخليوه يتحمر بلا زيت على نار مهيلة ثم نخليوه يبرد و نهرمشوه
ندوبو شكلاط اسود نوع مزيان في حمام مريم ثم نزيدو عليه اللوز مهرمش و نخلطو و نسرحوه فوق ورق المنيوم او بلاستيك و نخليوه يبرد ثم نجمعوه حتى نحتاجوه للحلوة او اي حاجة اخرى و يمكن نديروه في قوالب و منين يجمد نزولوه و نحتفظ به فبلاستيكة الى حين الاستعمال

منين نعصرو الحامض نحتفظ بالقشور في المجمد و منين نبغيو نديرو القشرة ديال الحامض في حلوة او كيكة نجبدوهم و نحكوهم فالحكاكة الرقيقة و نستعملوهم

منين نسلقو الخضر لتحضير السلطة كنديرو معاها ضرس ثومة و شوية الملح و منين تسلق نصفيوها من الماء و نستعملو ماء السلق فالطاجين او المرقة و ضرس الثومة اللي صلقنا كنحكوه و نديروه مع صلصة السلطة كنخلطو شوية شوية ملح و ابزار ابيض مع زيت بلدية و شوية خل و عصير حامض ثم نزيدو عليهم ضرس الثومة مسلوق و محكوك و شوية معدنوس مقطع و نخلطو و نديروها مع الخضر اللي سلقنا

ماء سلق البطاطا نستعملوه لتحضير البريوش مثلا نديرو شوية زبدة و شوية ملح و خميرة معجونة و خمارة و نصف كاس سنيدة و الحليب و شوية من ماء سلق البطاطا و نخلطو و نجمعو بالدقيق و نديروه على شكل بريوش

ضامة البنة
باش نحصلو على ضامة البنة منين نبخرو اللحم او الدجاج او الحوت ناخدو الماء اللي تبخرو فيه و نديروه في قوالب الثلج و نجمدوه ثم نحتفظ به في اكياس في المجمد و نعزلو كل نوع بوحدو بالنسبة لضامة اللحم او الدجاج يمكن نديروها فالحريرة او اشياء اخرى و بالنسبة لضامة الحوت نديروها في صلصة الحوت كتجي زوينة بزاف

منسم للساندويتش
ناخدو بصلة نقشروها و نقطعوها طريفات صغار و نشحروها فالزيت و الملح ثم نزيدو عليها فلفلة خضرا و فلفلة حمرا مقطعين مكعبات صغار و نخليوهم يتشحرو مزيان و منين يبردو نديروهم في بواطة فالثلاجة و منين نبغيو نديرو ساندويتش للوليدات نديرو لحم او دجاج و نديرو عليه شوية البصلة و الفلفلة ثم فرماج و يمكن نزيدو على البصلة و الفلفلة الثومة الى بغيناه فسندويتشات للكبار و كيبقى صالح فالثلاجة لمدة 3 ايام

السمن الحار
نغسلو الزبدة بلدية (باش يزول الحليب اللي فيها) و نخليوها جانبا
نديرو كاس ماء مع 2 معالق زعتر و نخليوه يغلي شوية و منين يبرد مزيان نصفيوه
ناخدو الزبدة اللي عندنا نزيدو عليها الملح و الماء ديال الزعتر و نخدموها مزيان باليد باش يدخل فيها ماء الزعتر ثم نديروها في قرعة ديال الزجاج و نكبو عليها شوية ماء الزعتر الفوق و نسدوها و نخليوها مدة 40 يوم ثم نحلو القرعة و نخويو الماء اللي فيها و غدي نلقاو السمن واجد للاستعمال

بالنسبة للحلوة اللي كتلصق بالمربى و كتكون وحدة عادية و وحدة مثقوبة من الوسط باش نحصلو على منظر زوين ناخدو مربى جاري و نخلطو شوية مع سيرو احمر و شوية مع سيرو اخضر ثم نلصقو الحلوة باش نحصلو على لون اخضر و احمر و نزوقو بشوية اللوز مقلي و مهرمش من الجناب

بعض المرات منين كنوجدو حلوة الصابلي كيكون الدقيق خايب و كتفرتت لينا العجينة و ماتبغيش تجمع في هذه الحالة ناخدو ابيض البيض (ماشي الاصفر) و نخلطوه مع العجينة ثم نديرو الاشكال اللي بغينا

ترقاد الحامض
ناخدو كيلو حامض او اكثر من النوع الغليض و نديروه في اناء و نكبو عليه الماء سخون مزيان و نغطيوه و نخليوه يبرد ثم ننشفوه و نشقوه و نعمروه بالملح و نديروه في قرعة و ناخدو صريرة نديرو فيها شوية الزعتر و 3 او 4 حبات من عود النوار (القرنفل) و 2 وريقات من الورد البلدي و نديروها فوق الحامض و نديرو بلاستيكة بيضاء و نسدو القرعة مزيان و نقلبوها على فمها و نخليوها يومين حتى لاسبوع عاد نحطوها عادية هاد الطريقة كنديروها باش ماينشفش الحامض اللي الفوق و يخسر

المسكة منين تلصق فالملابس ناخدو شوية زبدة و ندهنو بيها الظهر اللي مافيهش المسكة و نلويوها و نديروها فالثلاجة ثم نخرجوها و نكرطوها بسهولة

لتصبين ملابس الصوف بحال الهيدورة او سلهام او جلابة او عباية نفزكوهم و نديرو ليهم الصابون و ناخدو واحد الشطبة تسمى تيغيغشت (تباع عند العطار) و ننقيوها من العويدات و نخبطو بيها ملابس الصوف كتطلق الرغوة مزيان و كتخرج نقية و اللون الابيض صافي
المجوهرات ديال البلاكي اوركتطلق الكحولة فالعنق او اليد منين كنعرقو « plaqué or »لتفادي هذا المشكل منين نشريوها ندهنوها بلاباز ( الصباغة اللي كيكون لونها شفاف) بالنسبة للكورميط و الخاتم ندهنوهم من الجهة الدخلانية و السنسلة ندهنوها كاملة و منين تزول لاباز و تقشر نعاودو نفس العملية

المسكة فالحوايج نحكو عليها قطعة ثلج او الى كنا مزروبين ندخلوها للمجمد و منين تجمد نزولوها بالموس بسهولة

لتنظيف الجلدة ديال باب الثلاجة ندهنوها كاملة من الفوق للتحت بمعجون الاسنان و نخليوها من 2 الى 3 دقائق و ناخدو شيتة ديال الاسنان (خاصة بهذا الغرض) و نبقاو نحكو بيها ثم نمسحو بزيف فازك و نعاودو بزيف ناشف بهذه الطريقة كتولي الجلدة نظيفة و كتبقى ريحة زوينة فالثلاجة

الجلدة ديال الكوكوت مع الاستعمال كتشقق و تولي الكوكوت تتنفس باش نتفاداو هذا المشكل منين تكون الجلدة جديدة قبل مانركبوها ندهنوها بالزبدة و نخليوها ليلة كاملة و في الغذ نركبوها فالغطاية ديال الكوكوت كتبقى مزيانة مدة طويلة و ماكتنفسش الكوكوت

السفة ديال الشعرية باش يجي فيها لون زوين و مذاق رائع عوض الماء نرشوها بالحليب فجوج التفويرات الاخيرة..

منقول ،،

تاريخ الميلاد : 10/05/1991

الردود على المواضيع

منتديات المميزة

نصائح نصائح نصائح ...

نصائح نصائح نصائح ...

نبذة عنا